Pifaqorun Tetraktsı

Pifaqorçuların əsas simvollarından biri tetraktsdır (τετρακτύς). Tetrakts və ya dekadın tetraktsı ümumilikdə üzərində on nöqtə ehtiva edən və dörd sətirdən ibarət olan üçbucaqlı fiqurdur. Sətirlərə müvafiq olaraq: bir, iki, üç və dörd nöqtə yerləşmişdir. Həmçinin bu nöqtələr dördüncü üçbucaq ədədinin həndəsi göstəricisidir.

Pifaqor simvolu – tetraktsın mənası:

1. İlk olaraq bu dörd rəqəm kainat musiqisi (musica universalis) və kosmos olaraq simvollaşdırılır:
   a. “Monad” – Birlik
   b. “Dyad” – Güc – Limitli/ Limitsiz
   c. “Triad” – Harmoniya
   d. “Tetrad” – Kosmos

2. Dörd sətrin cəmi on nöqtə təşkil edir. Bu da daha yüksək səviyyəli nizamın birliyidir (dekad).

3. Tetrakts dörd klassik elementi ifadə edir: hava, od, su və torpaq.

4. Tetrakts fəzanın quruluşunu təmsil edir:
   a. İlk sətir ölçüsüz (nöqtə);
   b. İkinci sətir birölçülü (iki nöqtə arasındakı düz xətt);
   c. Üçüncü sətir ikiölçülü (üç nöqtənin əmələ gətirdiyi üçbucaq);
   d. Dördüncü sətir üçölçülü fəzanı təmsil edir (dörd nöqtənin əmələ gətirdiyi tetraedr).

Pifaqorçuların dualarının birində birbaşa tetraktsa xitab olunub və ondan mərhəmət arzulanıb. Bu tetraktsın pifaqorçular üçün nə qədər önəmli olduğunu bir daha göstərir. Həmçinin onlar bu xassələrinə görə tetraktsı “Mistik tetrad” olaraq da adlandırmışlar.